आँखा संवाददाता
आइतबार, फागुन ७ २०७९
भद्रपुर । भद्रपुर ७ स्थित एमरेल्ड एकाडमीको ३६ औं स्थापना दिवश तथा अभिभावक उत्सव विविध कार्यक्रमका बीच सम्पन्न गरिएको छ ।
विद्यालय व्यवस्थापन समितिका अध्यक्ष कुमार बस्नेतको अध्यक्षता तथा भद्रपुर नगर प्रमुख गणेश पोखरेलको प्रमुखा आतिथ्यमा उत्कृष्ट विद्यार्थी सम्मान तथा विविध साँस्कृतिक कार्यक्रम सम्पन्न गरिएको हो ।
विद्यालयका संस्थापक प्रिन्सिपल प्रा. डा पृथ्वीविक्रम राईले वार्षिक गतिविधि सहित आगामी नीति तथा कार्यक्रम प्रस्तुत गर्दै झापाकै उत्कृष्ट विद्यालयका रूम शिक्षण सेवा प्रवाह गर्ने प्रतिबद्धता सार्वजनिक गरेका थिए ।
विद्यालयका प्रिन्सिपल दिगम्बरराज अधिकारीले शैक्षिक गतिविधि प्रस्तुत गर्दै बालमैत्री वातावरणमा उत्कृष्ट शिक्षण सेवा प्रवाह गरिरहेको प्रष्ट पारेका थिए ।
विद्यालयकी छात्रा प्रतिमा अधिकारीले स्वागत गरेको कार्यक्रममा भद्रपुर नगर उपप्रमुख राधा कार्की, भद्रपुर ७ का वडाध्यक्ष अभिषेक ढुंगाना, विद्यालयका पूर्व विद्यार्थी डा. अमर कपुरी लगायतले धारणा राख्दै एमरेल्ड एकाडमीले भद्रपुरमा रहेर झापाको गुणस्तरीय शिक्षणमा पुर्याएको योगदानको चर्चा गरेका थिए ।
विलयमा अध्ययनरत विभिन्न विधामा उत्कृष्ट छात्र छात्रालाई पुरस्कृत गरिएको कार्यक्रममा विभिन्न जातीय संस्कृति झल्कने नृत्य समेत विद्यार्थीद्वारा प्रस्तुत गरिएको थियो ।