मादक पदार्थ सेवन गरी मध्यरातमा गाउँले थकार्उने शाहीको मिलापत्र

image आँखा संवाददाता सोमबार, जेष्ठ ३१ २०७८
image

सुर्खेत । वीरेन्द्रनगर–१३ स्थित करेखोला जनताको चर्को विरोध पछि अभियन्ता ज्ञानेन्द्र शाही समूह पछि हटेको छ ।

गत शुक्रवार सामाजिक अभियन्ता शाही समूह र करेखोला स्थानीय बिच भएको झडपमा पाँच जना स्थानीयलाई प्रहरीले पक्राउ गरेको थियो भने शाही समूहका घाइतेको उपचारका लागि प्रदेश अस्पताल पुर्‍याएको थियो ।

दुवै पक्षसँग प्रहरीले छलफल चलाई १३ नं.वडा अध्यक्ष भूपेन्द्र दर्लामीको रोहवरमा मेलमिलाप गरिएको जिल्ला प्रहरी कार्यालय सुर्खेतका प्रवक्ता एवं डिएसपी राम प्रसाद घर्ती मगरले बताए ।

गाउँमा रातको समयमा रक्सीले मातिएर थर्काउन र लड्न खोजेपछि गाउँले पनि प्रतिकारमा अगाडि बढेको हो । दुवै पक्षले आज आ-आफ्नो गल्ती स्वीकार गरेपछि आफ्नो पाँच जना रिहाइ भएको स्थानीय मिना सलामीले बताएकी छिन् ।

शुक्रबार राति झण्डै ११ बजेतिर शाहीको समूह वीरेन्द्रनगर आउँदै थियो, यताबाट स्थानीय मजदुरहरु घरतिर फर्किदै थिए’ जिल्ला प्रहरी कार्यालय सुर्खेतका सूचना अधिकारी डीएसपी रामप्रसाद घर्तीले भने, ‘वीरेन्द्रनगर स्थित करेखोलामा  उनीहरुको जम्काभेट भयो । त्यसपछि दुबै समूहबीच विवाद भयो र त्यसपछि हात हालाहाल भयो ।’

डीएसपी घर्तीले झडपमा दुबै समुहका व्यक्तिहरु घाइते भएको बताए । उनले भने, ‘ज्ञानेन्द्र शाहीले आरोप लगाएजस्तो यो घटना देखिन्न । उहाँहरुको राजनीति पृष्ठभूमि के हो, त्यो थाहा भएन । तर, राननीतिक दलबाट परिचालितजस्तो लाग्दैन । लेबर काम गर्ने स्थानीय युवा हुन् । राजनीतिबारे खासै जानकारी राख्ने जस्ता युवाहरु छैनन् ।’

स्थानीयले भने  निषेधाज्ञाको समयमा किन गाउँ छिरेको भन्दै प्रतिवाद गरेपछि झडप भएको बताएका छन् । झडपमा दुवै पक्षका दर्जन बढी घाइते छन् । उनीहरुको अवस्था सामान्य रहेको र प्रदेश अस्पतालमा उपचार भएको छ ।

ad